Ibigo bigikoresha aba-ingénieurs batanditse mu rugaga byatunzwe agatoki 2022-04-05



Ibigo bigikoresha aba-ingénieurs batanditse mu rugaga byatunzwe agatoki

Urugaga rw’Aba-Ingénieurs mu Rwanda rwatangaje ko mu nzitizi rugifite uyu munsi harimo ibigo by’abikorera n’ibya Leta biha akazi ba-Ingénieurs batari mu rugaga, kandi itegeko ribibuza.

Ibi byagurutsweho ku wa 31 Werurwe 2022, umunsi hagombaga guteranaho inteko rusange y’uru rugaga ariko ikaza gusubikwa kubera ubwitabire buri hasi.

Umunyamabanga Nshingwabikorwa w’Urugaga rw’Aba-Ingénieurs, Steven Sabiti, yavuze ko iyi nteko rusange yari igamije kurebera hamwe uko urugaga ruhagaze muri rusange, gusuzuma raporo z’ibijyanye n’imari ndetse n’ibikorwa byakozwe.

Yakomeje avuga ko iyi nteko rusange itabashije guterana kubera ko itegeko rivuga ko kugira ngo iterane, nibura hagomba kuba hari 2/3 by’abanyamuryango, ariko ntibabashije "kuzuza uyu mubare".

Sabiti yavuze ko yari igiye guterana mu gihe urugaga ruri gukora amavugurura mu by’ikoranabuhanga, kugira ngo rurusheho gutanga serivisi nziza ku banyamuryango.

Ati "Ubundi urugaga ruhagaze neza muri rusange, rwagiye rwiyubaka mu buryo bushimishije. Rumaze kugira abanyamuryango barenga 2700, rufite n’ibigo bitanga ubujyanama birenga 200."

"Murumva ko umubare w’abanyamuryango umaze kuzamuka kandi turi kubaka uburyo bw’ikoranabuhanga buzadufasha guha abanyamuryango serivisi mu buryo bwihuse."

Haracyari inzitizi

Nubwo uru rugaga rugenda rutera imbere, Sabiti yavuze ko uyu munsi hari imbogamizi bagihura nazo zirimo no kuba hari abantu bahabwa akazi nk’aba-Ingénieurs kandi batanditse mu rugaga.

Ni ibintu yemeza ko binyuranye n’itegeko rigenga imirimo y’abahanga mu guhanga inyubako n’iy’abahanga mu by’ubwubatsi, rikanashyiraho ingaga z’abakora iyo myuga mu Rwanda.

Ati "Navuga ko tugifite ibintu bimwe na bimwe bitubangamiye mu mikorere yacu, kimwe ni ukuba hari abantu bakora batanditse mu rugaga nubwo itegeko rivuga ko umuntu wese ukora umwuga ujyanye na ’engineering’ agomba kuba yanditse mu rugaga."

"Umuntu yitwa ’Ingénieur’ gusa iyo aje mu rugaga akiyandikisha tukamuha umubare umuranga, akabona no gutangira gukoresha iryo zina ry’akazi imbere y’andi mazina ye."

Yakomeje avuga ko hari ibigo byinshi bitanga akazi ku bantu batari muri uru rugaga, birimo n’ibya Leta.

Ati "Yego tubiganiraho na Leta n’inzego zitandukanye, tugerageza kwandikira ibigo bikoresha aba-Ingénieurs, ariko ubona bitarafata umurongo neza ku buryo usanga muri ibyo bigo bya Leta harimo aba-Ingénieurs b’uturere ariko batanditse mu rugaga, ariko tuzakomeza gushyiramo imbaraga."

Zimwe mu mpamvu aba-Ingénieurs baba bagomba kwiyandikisha mu rugaga ngo ni ukugira ngo hagenzurwe ubumenyi bwabo ndetse n’ibyangombwa bishobora kubemerera gutangira gukora aka kazi.

Sabiti ati "Kwemererwa gukora utanditse ni icyaha, impamvu tugenzura Ingénieur tukamwandika ndetse tukamuha n’ibyangombwa ni ukugira ngo hamenyekane urwego arimo kuko hari ushobora kubaka inzu igeretse kabiri, hari n’udashobora kuyubaka kandi bafite impamyabumenyi imwe."

"Ariko tureba uburambe umuntu amaze kugira tukavuga tuti ’uyu muntu ubumenyi amaze kugira bwatuma abasha gukora uyu mushinga."

Urugaga rw’Aba-Ingénieurs rwatangiye mu 2008, rufite inshingano zo gukora ubuvugizi, kugenzura serivisi n’iterambere rirambye ry’Aba-Ingénieurs mu Rwanda.


Notice Board
Training on Bridge Design With MIDAS CIVIL
Press Release- Rwanda celebrates World Engineering Day
IER Documents
Legal documents
Members' documents